Codice Universal de Conducta del Fundation Wikimedia

This page is a translated version of the page Policy:Universal Code of Conduct and the translation is 96% complete.

Outdated translations are marked like this.

Vole adjutar a traducer? Traduce le messages mancante.

Proque nos ha un Codice Universal de Conducta

Nos crede que es necessari dar al maxime numero possibile de personas le poter de participar activemente in projectos e spatios de Wikimedia, a fin de attinger nostre vision de un mundo in le qual omnes pote contribuer al totalitate del cognoscentia human. Nos crede que nostre communitates de contributores debe esser tanto diverse, inclusive e accessibile como possibile. Nos vole que iste communitates sia ambientes positive, secur e salubre pro omnes qui adhere (e qui vole adherer) a illos. Nos es dedicate a garantir que remane assi, incluse per medio del adoption de iste Codice de Conducta e su reexamination pro actualisationes quando necessari. In ultra, nos desira proteger nostre projectos contra illes qui damnifica o distorque le contento.

In accordo con le mission de Wikimedia, cata uno qui participa in projectos e spatios de Wikimedia:

adjuta a crear un mundo in le qual omnes pote liberemente condivider le totalitate del cognoscentia;
face parte de un communitate global que evita le preconceptiones e partialitates;
se effortia pro accuratessa e verificabilitate in tote su labor.

Iste Codice Universal de Conducta (CUC) defini un gruppo de directivas minime pro comportamento expectate e inacceptabile. Illo se applica a omnes qui interage e contribue a projectos e spatios de Wikimedia in linea e foras de linea. Isto include le contributores nove e experte, functionarios intra le projectos, organisatores e participantes de eventos, empleatos e membros del consilio de administration de affiliatos e empleatos e membros del consilio de administration del Fundation Wikimedia. Illo se applica a tote le projectos de Wikimedia, spatios technic, eventos in persona e virtual, como etiam al sequente casos:

interactiones private, public e semipublic;
discussiones de disaccordo e expression de solidaritate inter membros del communitate;
problemas de disveloppamento technic;
aspectos de contribution de contento;
casos de representar affiliatos/communitates a partners externe.

1 – Introduction

Le Codice Universal de Conducta forni un base de comportamento pro le collaboration in projectos Wikimedia a nivello mundial. Communitates pote adder a isto pro disveloppar politicas que prende in consideration le contexto local e cultural, ma debe mantener le criterios listate hic como standard minime.

Le Codice Universal de Conducta se applica equalmente a tote le Wikimedianos sin exception. Actiones que contradice le Codice Universal de Conducta pote resultar in sanctiones. Istes pote esser imponite per functionarios designate (como es appropriate in lor contexto local) e/o per le Fundation Wikimedia como le proprietario juridic del platteformas.

2 – Comportamento expectate

Omne Wikimediano, sia un redactor nove o experte, un functionario del communitate, o un membro o empleato de un affiliato o del consilio de administration del Fundation Wikimedia, es responsabile pro su proprie comportamento.

In omne projectos, spatios e eventos de Wikimedia, le comportamento debe fundar se in le respecto, le civilitate, le collegialitate, le solidaritate e le bon senso civic. Isto se applica a omne contributor e participante in su interaction con omne contributor e participante, sin expectationes basate sur etate, dishabilitates mental o physic, apparentia physic, origine national, religiose, ethnic e cultural, casta, classe social, fluentia linguistic, orientation sexual, identitate de genere, sexo o campo de carriera. Ni se face exceptiones basate sur position, habilitates o realisationes in le projectos o le movimento de Wikimedia.

2.1 – Respecto mutue

Nos expecta que tote le Wikimedianos monstra respecto pro alteres. In le communication con personas, in ambientes Wikimedia in linea assi como foras de linea, nos tractara le unes le alteres con respecto mutue.

Isto include, sin limitation, le sequente directivas:

Practica empathia. Ascolta e tenta comprender lo que Wikimedianos de differente origines vole dicer a te. Sia preste a confrontar e adaptar tu proprie comprehension, expectationes, e comportamento como un Wikimediano.
Suppone le bon fide, e ingagia in modificationes constructive; tu contributiones debe meliorar le qualitate del projecto o labor. Offere e recipe retroaction amabilemente e con bon fide. Criticas debe esser date de maniera sensibile e constructive. Tote le Wikimedianos debe supponer, a minus que existe evidentia contrari, que altere personas es presente pro meliorar le projectos de maniera collaborative. Nonobstante, isto non debe esser usate pro justificar declarationes con un impacto nocive.
Respecta le maniera in que le contributores se nomina e describe. Personas pote usar terminos specific pro describer se. Como signo de respecto, usa iste terminos quando tu communica con o sur iste personas, ubi lingual- o technicamente facibile. Exemplos include:
- gruppos ethnic pote usar un nomine specific pro describer se, in loco del nomine historicamente usate per alteres;
- personas pote haber nomines que usa litteras, sonos, o parolas de lor lingua que te pote esser incognite;
- personas qui se identifica con un certe orientation sexual o identitate de genere pote usar nomines o pronomines distincte;
- personas con un particular dishabilitate physic o mental pote usar terminos specific pro describer se.
Durante le reuniones in persona, nos dara le benvenita a omnes e nos prendera cura e respecto del preferentias, limites, sensibilitates, traditiones e requisitos de cata uno.

2.2 – Civilitate, collegialitate, supporto mutue e bon senso civic

Nos labora pro monstrar le sequente comportamentos:

Civilitate es le cortesia in le comportamento e le parola inter personas, includente estranieros.
Collegialitate es le supporto amical que personas ingagiate in un effortio commun extende inter se.
Supporto mutue e bon senso civic significa prender un responsabilitate active pro assecurar que le projectos de Wikimedia sia spatios productive, agradabile e secur, e que illos contribue al mission de Wikimedia.

Isto include, sin limitation:

Mentorato e accompaniamento: Adjutar nove arrivantes a orientar se e acquirer competentias essential.
Prender cura de co-contributores: Offerer les un mano quando illes ha besonio de adjuta, e prender lor defensa quando on les tracta de un maniera que non respecta le comportamento expectate secundo le Codice Universal de Conducta.
Recognoscer e attribuer merito al labor realisate per collaboratores: Regratiar les pro lor adjuta e labor. Appreciar lor effortios e attribuer merito ubi es meritate.

3 – Comportamento inacceptabile

Le Codice Universal de Conducta visa a adjutar membros del communitate a identificar situationes de comportamento inacceptabile. Le sequente comportamentos es considerate inacceptabile intra le movimento Wikimedia:

3.1 – Molestia

Isto include omne comportamento principalmente intendite a intimidar, indignar o perturbar un persona, o omne comportamento ubi isto pote rationabilemente esser considerate le consequentia plus probabile. Un comportamento pote esser considerate como molestia si illo supera lo que un persona rationabile deberea tolerar in un ambiente global e intercultural. Le molestia se presenta frequentemente como abuso emotional, particularmente verso personas in un position vulnerabile, e pote includer le contacto con locos de labor o amicos e membros de familia con le objectivo de intimidar o embarassar. In alcun casos, un comportamento que non attingerea le nivello de molestia in un caso singule pote devenir molestia per repetition. Le molestia include ma non es limitate a:

Insultos: Isto include le invectivas, le uso de insultos o stereotypos, e omne attaccos basate sur characteristicas personal. Insultos pote referer a characteristicas percipite como intelligentia, apparentia, ethnicitate, racia, religion (o le manco de illo), cultura, casta, orientation sexual, genere, sexo, dishabilitate, etate, nationalitate, affiliation politic, o altere characteristicas. In alcun casos, le repetition de derision, sarcasmo, o aggression pote constituer insultos collectivemente, mesmo si le declarationes individual non lo facerea.
Molestia sexual: Attention sexual o avantias de tote sorta verso alteres quando le persona sape o rationabilemente debe saper que le attention non es benvenite o in situationes ubi le consentimento non pote esser communicate.
Menacias: Suggerer explicite- o implicitemente le possibilitate de violentia physic, embarasso injuste, damnos injuste e injustificate al reputation, o intimidation per suggerer action juridic gratuite a fin de ganiar un argumento o fortiar un persona a comportar se del maniera desirate.
Incitar a facer mal a alteres: Isto include incitar un altere persona a nocer a se mesme o al suicidio, assi como incitar alcuno a conducer attaccos violente contra tertie personas.
Divulgation de datos personal (doxxing): divulgar information private de altere collaboratores, como le nomine, loco de empleo, adresse physic o electronic sin lor consentimento expresse, sia in le projectos de Wikimedia o in altere locos, o divulgar information sur lor activitate in Wikimedia foras del projectos.
Persecution: sequer un persona a transverso del projecto(s) e criticar su labor repetitemente con le intention principal de perturbar o dissuader. Si le problemas continua post tentativas de communication e education, le communitates pote deber tractar los per medio del procedimentos communitari establite.
Trolling: Deliberatemente perturbar conversationes o parlar de mal fide con le intention de provocar.

3.2 – Abuso de poter, privilegio o influentia

Le abuso occurre quando un persona in un position real o percipite de poter, privilegio, o influentia se ingagia in un comportamento irrespectuose, cruel e/o violente verso altere personas. In le contextos de Wikimedia, isto pote prender le forma de abuso verbal o psychologic e pote superponer se al molestia.

Abuso de officio per functionarios, representantes e personal: uso de autoritate, cognoscentia o ressources a disposition de functionarios designate, assi como representantes e personal del Fundation Wikimedia o de affiliatos de Wikimedia, pro intimidation o menaciar alteres.
Abuso de ancianitate e relationes: Uso del proprie position e reputation pro intimidar alteres. Nos expecta que personas con experientia e relationes significante in le movimento se comporta con cura special, perque commentos hostil de illes pote comportar repercussiones non intendite. Personas con autoritate communitari ha le privilegio particular de esser considerate como digne de fide e non debe abusar de isto pro attaccar alteres qui non es de accordo con illes.
Manipulation psychologic: Malitiosemente causar que un persona dubita su proprie perceptiones, sensos, o comprehension con le objectivo de ganiar un argumento o fortiar un persona a comportar se del maniera que tu vole.

3.3 – Vandalismo de contento e abuso del projectos

Introduction deliberate de contento prejudiciate, false, inaccurate o inappropriate, o obstruer, impedir o de altere maniera entravar le creation (e/o mantenentia) de contento. Isto include ma non es limitate a:

Le remotion repetite arbitrari o non motivate de qualcunque contento sin discussion appropriate o sin fornir un explication adequate
Manipulation systematic de contento pro favorir interpretationes specific de factos o punctos de vista (tamben per medio del rendition incorrecte o malitiosemente false de fontes e alterar le maniera correcte de componer contento editorial)
Discurso de odio in qualcunque forma, o linguage discriminatori con le intention de vilificar, humiliar, incitar odio contra individuos o gruppos a base de lor identitate o lor credentias personal
Le uso de symbolos, imagines, categorias, etiquettas o altere typos de contento que es intimidante o nocive a alteres foras del contexto del uso encyclopedic e informative. Isto include le imposition de schemas sur contento con le intention de marginalisar o ostracisar.